Մարզերն ուշադրության կենտրոնում

ՀՀ առողջապահության նախարար Դերենիկ Դումանյանն օրերս գործակարգավարական խորհրդակցություն էր հրավիրել` Երևանի քաղաքապետարանի և մարզպետարանների առողջապահության և սոցիալական հարցերի վարչությունների ու բաժինների պետերի մասնակցությամբ:

Երևանի քաղաքապետարանի և մարզպետարանների առողջապահության ոլորտի պատասխանատուները նախարարին ներկայացրել են մարզային ենթակայության բուժհաստատություններում առկա իրավիճակը, տեղեկացրել համավճարի, Ծննդօգնության և Երեխայի պետական հավաստագրերի ծրագրերի գործընթացի, ինչպես նաև բուժհաստատությունների ֆինանսական, դեղերով և կադրերով ապահովվածության, առկա խնդիրների վերաբերյալ։

Արձանագրվել է, որ Համավճարի, Ծննդօգնության և Երեխայի պետական հավաստագրերի ծրագրերը մարզերում արդյունավետ են գործում։ Վստահության հաշվին ավելի շատ են դիմում Երեխայի պետական հավաստագրով: Ինչպես ազգաբնակչությունն, այնպես էլ բուժաշխատողները գոհ են շտապօգնության ծառայության արդիականացման ծրագրից: Սակայն դեռևս խնդիր է ծննդաբերությունների, ինչպես նաև բուժօգնության այլ տեսակների գծով արտահոսքը մարզերից Երևան:

Ծանոթանալով համակարգում առկա իրավիճակին և մարզային խնդիրներին` նախարարը նշել է, որ Հարություն Քուշկյանի ղեկավարությամբ մարզերում առողջապահության ոլորտի զարգացման ուղղությամբ բավական լուրջ աշխատանք է տարվել, հզոր կենտրոններ են ստեղծվել, և սկսված բոլոր աշխատանքները պետք է շարունակվեն։ Նա հորդորել է ուշադրության կենտրոնում պահել ընթացող բարեփոխումները։

Միաժամանակ, Դերենիկ Դումանյանը կարևորել է ՀՀ կառավարության ծրագրով առողջապահության համակարգի առջև դրված խնդիրների պատշաճ կատարումը, որն առաջին հերթին ուղղված է առողջապահական ծառայությունների մատչելիությանը, դրանց հասանելիությանը և որակի բարձրացմանը։

Առողջապահության նախարարը մարզպետարանների առողջապահության ոլորտի պատասխանատուների հետ քննարկել է նաև կադրային քաղաքականությանը, մասնագետների վերապատրաստումներին, հիվանդներին Երևանի բուժհաստատություններ անհիմն ուղեգրելուն վերաբերող և կազմակերպչական այլ հարցեր։ Նա տեղեկացրել է, որ այսուհետև փոխնախարարները և ստորաբաժանումների ղեկավարները հաճախակի կլինեն մարզերում, տեղերում կծանոթանան խնդիրներին, որպեսզի առկա հարցերին տրվեն օպերատիվ և արդյունավետ լուծումներ։ Նաև կկազմակերպվեն կոլեգիայի արտագնա նիստեր։

«Որպես նախարար իմ առաջնային խնդիրներից մեկը մարզերում առողջապահական ոլորտի բարելավումն է լինելու։ Ձեզ հետ միասին մենք պետք է մեծ ջանքեր գործադրենք, որ մեր մարզերում ու համայնքներում մարդիկ անհրաժեշտ բժշկական սպասարկում ստանան և մայրաքաղաքային մասնագետներին դիմեն հիմնականում այն ժամանակ, երբ տեղերում այն հնարավոր չէ իրականացնել» ,-ասել է Դերենիկ Դումանյանը։

Հարցեր, պատասխաններ, մեկնաբանություններ